Бозии «Хуҷанд» ва «Нефтчӣ»-ро кӣ доварӣ мекунад?
Конфедератсиони футболи Осиё ҳакамонеро, ки бозиҳои бошгоҳҳои футболи «Нефтчӣ»-и Қирғизистон ва «Хуҷанд»-и Тоҷикистонро дар плей-оффи Ҷоми КФО-2020 доварӣ мекунанд, таъйин намуд. Бозии аввали плей-оффи Ҷоми КФО-2020 миёни “Нефтчӣ" барандаи Ҷоми Қирғизистон ва “Хуҷанд”-и Хуҷанд, ноиби қаҳрамони Тоҷикистонро ҳакамон аз Кореяи Ҷанубӣ бо сарварии довари ФИФА Чае Санг-Ҳёп баҳогузорӣ мекунанд.
Ҳакамони бозии ҷавобии плей-оффи Ҷоми КФО-2020 миёни «Хуҷанд» ва “Нефтчӣ” аз Урдун мебошанд. Довари ФИФА Аҳмад Файсал Муҳаммад Ал-Алӣ сардовари ин бозӣ таъйин шудааст.
Бозии аввали плей-оффи Ҷоми КФО-2020 миёни дастаҳои “Нефтчӣ” ва “Хуҷанд” 19-уми феврал дар варзишгоҳи “Қурмонбек”-и Ҷалолобод ва бозии ҷавобӣ 26-уми феврал дар Варзишгоҳи марказии Душанбе баргузор мешаванд.
Аз рӯи натиҷагирии ду бозӣ миёни “Нефтчӣ” ва “Хуҷанд” дастаи ғолиб ба марҳилаи гурӯҳии Ҷоми КФО-2020 роҳ меёбад ва дар гурӯҳи “D” бо бошгоҳҳои “Истиқлол” (Тоҷикистон), “Олтин Асир” (Туркманистон) ва “Дордой” (Қирғизистон) бозӣ хоҳад кард.
Ҷоми АFC-2020
Минтақаи Марказӣ
Плей-офф. Бозии аввал
19-уми феврал (чоршанбе)
Оғози бозӣ – соати 14:00 (бо вақти маҳаллӣ)
«Нефтчӣ» (Қирғизистон) – «Хуҷанд» (Тоҷикистон)
Сардовар: Чае Санг-Ҳёп (Кореяи Ҷанубӣ)
Ҷалолобод, варзишгоҳи «Қурмонбек»
Плей-офф. Бозии ҷавобӣ
26-уми феврал (чоршанбе)
Оғози бозӣ – соати 16:00 (бо вақти Душанбе)
«Хуҷанд» (Тоҷикистон) – «Нефтчӣ» (Қирғизистон)
Сардовар: Аҳмад Файсал Муҳаммад Ал-Алӣ (Урдун).
Душанбе, Варзишгоҳи марказии ҷумҳуриявӣ